BAKI, 14 sentyabr — Sputnik. Dollardan istifadədən uzaqlaşma həm BRİKS ölkələrində, həm də bütövlükdə qlobal iqtisadiyyatda sabit templə baş verir, baxmayaraq ki, bu prosesi sürətləndirmək üçün əlavə iş görülməlidir.
Bu barədə "RİA Novosti" agentliyinə Rusiyada yerləşən investisiya cəlbi və biznes quruculuğu şirkəti olan "Netley Group"un prezidenti Maykl Qoddard bildirib.
"BRİKS bir növ qızılla dəstəklənən valyuta ilə çıxış etsəydi, əla olardı. Dollardan uzaqlaşma sürətlə baş verir. Son 20 ildə siz qlobal ödənişlərin dollarla payının durmadan azaldığını görürsünüz. Bu, hazırda daha da sürətlənir," – deyə Goddard sözünə davam edib.
Eyni zamanda, onun sözlərinə görə, həqiqətən də dollardan uzaqlaşmaq üçün bir neçə aspekti nəzərə almaq lazımdır.
"Onlardan biri ticarət aspektidir, ticarət üçün valyutadır. Bu, bütün tənliyin ən sadə hissəsidir. Məsələn, əgər BRİKS bir araya gələrək bəlkə də Rusiya, Çin, Hindistan, hər kimin olur-olsun, qızıl ehtiyatları ilə, valyutanı müəyyən dərəcədə dəstəkləyə bilsə, siz öz cibinizdə xərcləyə biləcəyiniz valyuta kimi bir şey icad edə bilərsiniz, lakin bu, ticarət üçün elektron valyuta olacaq. O zaman siz bu valyutada dünya ticarətinin əhəmiyyətli payını çox sürətlə həyata keçirə bilərsiniz", – deyə Goddard bəyan edib.
"Netley Group"un prezidenti bildirib ki, dolları əvəz etmək səylərinin "daha çətin hissəsi" valyutanın ehtiyat aspektidir.
"Məsələn, ABŞ-ın hazırda ən böyük üstünlüyü istiqraz bazarının genişliyidir", - deyə Goddard izah edib.
"Düşünürəm ki, bir üsul budur ki, BRİKS rəqabət edə biləcək bir şey hazırlaya bilər, bu, əslində BRİKS istiqraz bazarlarını birləşdirəcək bir texnologiya olardı. Yəni, əgər qızılla təmin edilmiş BRİKS valyutasını yaratmaq və eyni zamanda bütün BRİKS ölkələrinin və digər dost BRİKS ölkələrinin istiqraz bazarlarını texnologiyalarla əlaqələndirmək mümkün olsa, o zaman inanılmaz dərinlikli qlobal istiqraz bazarını yaratmaq olar", - deyə sahibkar bildirib.
Onun sözlərinə görə, bu iki şeyin - sabit ticarət valyutasının və güclü ümumi istiqraz bazarının birləşməsi dolları sıxışdırmaq üçün potensial yarada bilər. Bu prosesi hətta BRİKS-i genişləndirməklə və bu iqtisadi əlaqələrin dərinliyini artırmaqla sürətləndirmək olardı.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.