BAKI, 5 sentyabr - Sputnik. Rusiya Qarabağda təhlükəsizlik qarantı rolunu oynamaqda davam edir və öz missiyasını azaltmaq niyyətində deyil. Bu barədə jurnalistlərə Rusiya Federasiyası Prezidentinin mətbuat katibi Dmitri Peskov deyib.
“Rusiya bu regionda vəziyyətin sabitləşdirilməsində və münaqişənin aradan qaldırılmasında ardıcıl, çox mühüm rol oynamaqda davam edir. Biz bu rolu davam etdirəcəyik. Rusiya heç yerdən getmir və getmək fikrində deyil”, - deyə Peskov bildirib.
O, həmçinin bu regionun bütün dövlətlərinin iki il əvvəl bağlanmış üçtərəfli sazişlərə sadiq qalmasını vacib adlandırıb.
“Məhz bu müqavilələrin müddəalarına riayət etmək uğurun açarıdır. Təbii ki, bundan sonra vəziyyəti bir azacıq dəyişən yeni hadisələr baş verdi. Amma bu o demək deyil ki, Rusiya hansısa yolla öz fəaliyyətini başa vuracaq... Rusiya təhlükəsizlik qarantı rolunu oynamaqda davam edir”, - deyə Kremlin nümayəndəsi əlavə edib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.