BAKI, 22 avqust — Sputnik. Avqustun 22-də Cənubi Afrikada BRİKS-in üç günlük sammiti işə başlayır. Sammitdə Braziliya, Rusiya, Hindistan, Çin və Cənubi Afrikanın nümayəndələri və onlarla ölkənin liderləri ilə birlikdə qrupun genişləndirilməsi və onun tərkibinə yeni üzvlərin qəbulu məsələləri müzakirə ediləcək.
Cənubi Afrika Xarici İşlər Nazirliyi 23 ölkənin BRİKS-ə qoşulmaq üçün rəsmi müraciət etdiyini və bir sıra dövlətlərin qeyri-rəsmi səviyyədə maraqlı olduğunu bildirib. Ümumilikdə Cənubi Afrika sammitə qlobal Cənubun və Afrikanın 67 ölkəsini dəvət edib.
Son illərdə ənənəvi olaraq BRİKS-ə sədrlik edən ölkə BRİKS+ formatında müzakirələr üçün sammitə təkcə "beşlik" liderlərini deyil, digər dövlətlərin nümayəndələrini də dəvət edir.
Yohannesburqda keçiriləcək sammitdə Çin, Hindistan, Braziliya və Cənubi Afrikanın liderləri iştirak edəcək, Rusiyanı isə ölkənin xarici işlər naziri Sergey Lavrov təmsil edəcək. Rusiya prezidenti Vladimir Putin sammitdə videokonfrans vasitəsilə iştirak edəcəyini açıqlayıb.
Rusiyanın xarici işlər naziri Sergey Lavrov bu gün BRİKS sammitində iştirak edəcəyi Yohannesburqa gəlib.
Yeni BRİKS necə görünəcək?
Gözlənildiyi kimi, sammitdə əsas məsələ BRİKS-in genişləndirilməsi və yeni üzvlərin qəbulu üçün modallıqların və prosedurun hazırlanması zərurəti olacaq. Əvvəlcə bu format dördlük çərçivəsində mövcud idi - Braziliya, Rusiya, Hindistan və Çinin xarici işlər nazirləri ilk dəfə 2006-cı ildə BMT Baş Assambleyasının kənarında görüşmüşdülər. Cənubi Afrika rəsmi olaraq qrupa 2011-ci ildə qoşulub. Keçən il təşkilatın daha inklüziv olması üçün üzv ölkələrin sayının genişləndiriləcəyi açıqlanıb.
Cənubi Afrika Xarici İşlər Nazirliyinin məlumatına görə, hazırda dünyanın 23 ölkəsinin liderləri, o cümlədən Əlcəzair, Argentina, Banqladeş, Bəhreyn, Belarus, Boliviya, Kuba, Misir, Efiopiya, Honduras, İndoneziya, İran, Qazaxıstan, Küveyt, Mərakeş, Nigeriya, Fələstin, Səudiyyə Ərəbistanı, Seneqal, Tayland, Birləşmiş Ərəb Əmirlikləri, Venesuela və Vyetnam BRİKS-ə qoşulmaqda maraqlı olduqlarını rəsmən ifadə ediblər. Cənubi Afrika Xarici İşlər Nazirliyinin məlumatına görə, qeyri-rəsmi müraciətlər daha çox qəbul edilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.