BAKI, 15 avqust — Sputnik. ABŞ, NATO və Avropa İttifaqı Ukraynaya silah göndərməklə, nüvə güclərinin birbaşa hərbi toqquşması təhlükəsini xeyli artırır. Bunu Rusiya xarici işlər naziri Sergey Lavrov Beynəlxalq Təhlükəsizlik üzrə Moskva Konfransında bildirib.
"Bu gün Rusiyanı cilovlamaq və rus dünyasını parçalamaqla bağlı geosiyasi layihəsini xilas etmək üçün ABŞ, NATO və Avropa İttifaqı Ukraynanı getdikcə daha müasir silahlarla təmin edir, münaqişəni getdikcə daha çox qızışdırır və silahların bütün dünyada nəzarətsiz yayılmasına səbəb olur. Onların avantürist, məsuliyyətsiz davranışları nüvə gücləri arasında birbaşa hərbi toqquşma təhlükəsini əhəmiyyətli dərəcədə artırır", - deyə Lavrov bildirib.
Onun sözlərinə görə, Rusiya Federasiyasının xəbərdaredici siqnallarına məhəl qoyulmur və ya təbliğat məqsədilə kobud şəkildə təhrif olunur.
"Bu məsələ ilə bağlı artıq bir çox faktlar təqdim olunub. Qərb nüvə gücləri arasında birbaşa hərbi toqquşma təhlükəsini məsuliyyətsiz və əhəmiyyətli dərəcədə artırır", - Lavrov deyib.
"Eyni zamanda, aydındır ki, Rusiyanı ukraynalı nasistlərin əli ilə sındırmaq cəhdi birqütblü dünya düzənini canlandırmaq üçün strateji kursun tərkib hissəsidir", - nazir qeyd edib.
"Eyni məqsəd Vaşinqtonun hegemonluq planları yolundakı maneələri aradan qaldırmaq üçün istənilən fikir ayrılığının təhdid və şantaj obyektinə çevrildiyi digər regionlarda da həyata keçirilir", - Rusiya diplomatiyasının rəhbəri vurğulayıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.