BAKI, 13 avqust - Sputnik. Hazırda Yerin təbii peykinə doğru hərəkət edən “Luna-25” avtomatik stansiyasında ilk dəfə elmi cihazlar işə salınıb. Bu barədə jurnalistlərə Roskosmos-dan məlumat verib.
“Bu gün Rusiya Elmlər Akademiyasının Kosmik Tədqiqatlar İnstitutu tərəfindən hazırlanmış elmi avadanlıqlar kompleksinin ilk işə salınması kosmik uçuş şəraitində həyata keçirilib. Bütün cihazlardan alınan xidmət telemetriya məlumatları onların müntəzəm işləməsini göstərdi", - deyə dövlət korporasiyasından bildirilib.
Onlar dəqiqləşdiriblər ki, nəticədə Aya uçuşla bağlı ilk ölçmə məlumatları əldə edilib, elmi qrup artıq onları emal etməyə başlayıb.
Qeyd edək ki, "Luna-25" çətin relyefi olan Ayın Cənub Qütbü bölgəsinə yumşaq eniş edəcək ilk stansiya olmalıdır. Onun bütün sələfləri ekvator zonasına enib. Stansiyanın əsas məqsədi Ay torpağında buzun olması üçün təmas tədqiqatlarını aparmaqdır.
"Luna-25" həm də müasir Rusiya tarixində ilk Ay stansiyası olacaq. Yerin peykinə göndərilən sonuncu sovet kosmik gəmisi 1976-cı ildə buraxılıb və bu gəmi "Luna-24" adlandırılıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.