BAKI, 7 avqust — Sputnik. Türkiyə Rusiya və Ukrayna ilə Qara dəniz vasitəsilə ərzaq tədarükü ilə bağlı razılığa gələ bilən yeganə ölkədir. Bunu İtaliyanın xarici işlər naziri, baş nazirin müavini Antonio Tayani "la Stampa" qəzetinə müsahibəsində bildirib.
Tajani həmçinin Qara Dəniz Təşəbbüsünün fəaliyyətini şərh edib.
"Afrikalıların nə qədər taxıl aldığını bilmirəm, Misir mütləq ən çoxunu alıb. Amma buğda və taxılın qiyməti qalxır: əsas problem budur. Rusiya ilə Ukrayna arasında Türkiyə vasitəsilə müqavilə bağlanmalıdır. Putin avqustda Türkiyəyə gedəcək, ümid edirəm ki, razılıq əldə ediləcək", - İtaliyalı nazir bildirib.
Rusiya liderinin mətbuat katibi Dmitri Peskov daha əvvəl jurnalistlərə açıqlamasında bildirib ki, Putin və Ərdoğan görüşünün gündəliyinə ikitərəfli münasibətlər, Ukrayna və taxıl sazişi məsələsi daxildir.
Səudiyyə Ərəbistanının Ciddə şəhərində Ukrayna nizamlanmasına dair görüşdən danışan Tayani Pekinin iştirakının vacibliyini qeyd edib. O əlavə edib ki, sentyabrda Çinə səfər edəcək və orada bunu da müzakirə edəcək.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.