BAKI, 31 iyul — Sputnik. Avqustun 7-dən 11-dək Səmərqənddə Şanxay Əməkdaşlıq Təşkilatına (ŞƏT) üzv ölkələrin Biznes Tərəfdaşlığı Həftəsi keçiriləcək. Bu barədə Rusiya Federasiyasının Özbəkistandakı ticarət nümayəndəliyinin mətbuat xidməti məlumat yayıb.
"Tədbirin əsas məqsədi ŞƏT ölkələrinin biznes nümayəndələri arasında işgüzar əlaqələrin inkişafı, iqtisadiyyatın müxtəlif sahələrində əməkdaşlığın perspektivli istiqamətlərinin müzakirəsi, sənaye kooperasiyası üzrə yeni layihələrin və ticarət sazişlərinin hazırlanmasıdır", - deyə məlumatda bildirilir.
Mətbuat xidmətindən verilən məlumata görə, tədbir çərçivəsində plenar iclasların, ikitərəfli və çoxtərəfli danışıqların aparılması planlaşdırılır.
İclasların ŞƏT ölkələrinin regionları arasında elektron ticarət, yaşıl iqtisadiyyat, nəqliyyat və logistika, rəqəmsal transformasiya, regionlararası əməkdaşlıq, investisiya, sənaye əməkdaşlığı və əməkdaşlığın digər prioritet sahələrinə həsr olunacağı gözlənilir.