BAKI, 28 iyul — Sputnik. Çin Rusiya ilə iqtisadi və ticarət əməkdaşlığını qarşılıqlı fayda əsasında inkişaf etdirir və ardıcıl olaraq birtərəfli sanksiyalara qarşı çıxır. Bunu Çin Xarici İşlər Nazirliyinin sözçüsü Mao Nin bildirib.
Bundan əvvəl ABŞ Konqresinin Nümayəndələr Palatasının Kəşfiyyat Komitəsi ABŞ Milli Kəşfiyyatı Direktorunun Ofisinin qərb mediasına istinadlardan ibarət hesabatını dərc etmişdi. Bu hesabatda Çinin ikili təyinatlı texnologiyalarının, naviqasiya cihazları, hərbi təyyarələr, pilotsuz uçuş aparatları və elektron müharibə üçün ehtiyat hissələrinin Rusiya Federasiyasına tədarükü iddia edilir.
"Çin həmişə dünya ölkələri, o cümlədən Rusiya ilə bərabər və qarşılıqlı fayda əsasında normal ticarət-iqtisadi əməkdaşlığı inkişaf etdirib. Biz ardıcıl olaraq beynəlxalq hüquqi əsası olmayan birtərəfli sanksiyalara və ekstraterritorial yurisdiksiyadan istifadəyə qarşıyıq. BMT Təhlükəsizlik Şurası tərəfindən buna icazə verilmir", - Mao Nin deyib.
O, Çin və Rusiya arasındakı əməkdaşlığın üçüncü tərəflərə qarşı yönəlmədiyini və üçüncü tərəflərin müdaxiləsi və təhdidlərinə məruz qalmadığını vurğulayıb.
Birləşmiş Ştatlar müntəzəm olaraq Çini Rusiyaya sanksiyalardan yayınmağa və onu silahla təchiz etməyə kömək edərsə, ağır nəticələrlə hədələyir.
Bundan əvvəl Çin Xarici İşlər Nazirliyinin rəsmi nümayəndəsi Rusiya Federasiyasına Çin silahlarının tədarükü ilə bağlı Qərbin iddialarını artıq təkzib edərək vurğulamışdı ki, Kiyevi silahlandıran ölkələr dezinformasiya yaymağı dayandırmalı və məsuliyyəti başqalarının üstünə atmamalıdır. Rusiya Federasiyası Prezidentinin mətbuat katibi Dmitri Peskov bu cür planlarla bağlı sualı cavablandırarkən qeyd edib ki, Pekin onları qətiyyətlə təkzib edib.