BAKI, 23 iyun — Sputnik. Fətullah Gülənin terror təşkilatı kimi tanınan FETÖ üzvləri 2016-cı ildə Rusiya səfiri Andrey Karlovu qətlə yetirməklə Türkiyə ilə Rusiya Federasiyası arasında gərginliyi qızışdırmaq niyyətində olublar. Sabah qəzeti yazır ki, bu barədə Türkiyə Ali Kassasiya Məhkəməsi bildirib.
Karlov 2016-cı il dekabrın 19-da Ankarada "Rusiya Kalininqraddan Kamçatkaya səyahətçinin gözü ilə" fotosərgisinin açılışında güllələnib. Hücumu təhlükəsizlik qüvvələri tərəfindən zərərsizləşdirilən polis əməkdaşı Mevlüt Mert Altıntaş həyata keçirib.
Ankara Regional Məhkəməsi 2022-ci ildə Karlova sui-qəsd cəhdində iştirak edən 13 nəfərin şikayətlərinin əksəriyyətini rədd edib.
"Sabah" qəzeti yazır ki, Ali Kassasiya Məhkəməsi 13 müttəhimin iddialarına baxdıqdan sonra onlardan biri Mustafa Özkanın "kifayət qədər dəlil olmadığına" görə təqsirli olmadığına qərar verib.
Məhkəmə qərarında göstərilib ki, ittiham olunanlar Rusiya Federasiyası ilə Türkiyə arasında münasibətləri müharibə səviyyəsinə çatdırmaq, xaos yaratmaq və 2016-cı il iyulun 15-də baş vermiş uğursuzluqla nəticələnmiş çevriliş cəhdindən sonra yeni dövlət çevrilişi cəhdinə yol açmaq niyyətində olublar.
Qeyd olunur ki, Gülənçilər bəzi mənbələrdən Karlovun sərgidə gülləkeçirməz jiletsiz olacağı barədə məlumat alıblar. Səfirin öldürülməsi əmrinin Altıntaşa birbaşa ABŞ-da yaşayan FETÖ rəhbəri Güləndən verildiyi məhkəmədə qeyd edilib.
Rusiya Prezidenti Vladimir Putin Karlovu ölümündən sonra Rusiya Qəhrəmanı adına layiq görüb.
İyirmi səkkiz şübhəli Rusiya səfirinə qarşı sui-qəsdin təşkilində ittiham olunub. ABŞ-da yaşayan din xadimi Gülən ittihamları rədd edib. 2021-ci ilin martında Ankara məhkəməsi Karlovun qətli ilə bağlı hökm çıxarıb. Beş təqsirləndirilən şəxsə ömürlük həbs cəzası verilib. 8 nəfər 3 il 9 aydan 15 ilə qədər həbs cəzası alıb, daha 6 nəfər isə bəraət alıb. Gülən də daxil olmaqla, axtarışda olan daha 9 müttəhimin işi prokurorluğun tələbi ilə ayrıca icraata götürülüb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.