Paşinyan da Aİ-nin xüsusi nümayəndəsi ilə görüşdü

BAKI, 6 iyun — Sputnik. Ermənistanın baş naziri Nikol Paşinyan Avropa İttifaqının Cənubi Qafqaz üzrə xüsusi nümayəndəsi Toivo Klaar ilə Brüssel və Kişinyovda əldə olunmuş razılaşmaların icrasını müzakirə edib.

Ermənistan hökumətinin mətbuat xidmətinin məlumatına görə, görüş zamanı tərəflər razılaşmaların ardıcıl icrasının vacibliyini qeyd ediblər.

Paşinyan və Klaar Ermənistan və Azərbaycan arasında münasibətlərin normallaşması prosesi ilə bağlı məsələləri müzakirə ediblər.

Tərəflər həmçinin beynəlxalq mexanizm çərçivəsində Qarabağda yaşayan ermənilərin hüquqları və təhlükəsizliyi məsələlərini müzakirə ediblər.

Paşinyan əsas məsələlərin həllinə erməni tərəfinin yanaşmalarını təqdim edib.

İrəvana səfəri zamanı Klaar Ermənistanın xarici işlər naziri Ararat Mirzoyanla da danışıqlar aparıb.

Ermənistan Xarici İşlər Nazirliyinin mətbuat xidmətinin məlumatına görə, həmsöhbətlər regional təhlükəsizlik və sabitlik məsələlərini müzakirə ediblər. Bu kontekstdə onlar Ermənistan və Azərbaycan arasında münasibətlərin normallaşması prosesi ətrafında baş verənləri nəzərdən keçiriblər.

Mirzoyan Ermənistan tərəfinin regionda hərtərəfli və davamlı sülhün bərqərar olmasına sadiq olduğunu bildirib. O, bu istiqamətdə beynəlxalq tərəfdaşların hərtərəfli nizamlanması və ardıcıl səyləri baxımından mövcud əsas problemlərin həllinə qarşılıqlı sadiqliyin qorunmasının vacibliyini vurğulayıb.

Xatırladaq ki, Vaşinqtonda Ermənistan və Azərbaycanın xarici işlər nazirləri Ararat Mirzoyan və Ceyhun Bayramov arasında danışıqlar 4 gün (1-4 may) davam edib.

Mayın 14-də Avropa İttifaqı Şurasının prezidenti Şarl Mişelin vasitəçiliyi ilə Brüsseldə Ermənistanın baş naziri Nikol Paşinyan və Azərbaycan prezidenti İlham Əliyev arasında görüş olub.

İyunun 1-də Kişinyovdan 45 kilometr aralıda yerləşən Moldovanın Bulboaca kəndində Ermənistanın baş naziri, Fransa prezidenti, Almaniya kansleri, Avropa İttifaqı Şurasının prezidenti və Azərbaycan prezidenti arasında beştərəfli görüş keçirilib.