BAKI, 3 iyun - Sputnik. Yenidən Türkiyə Prezidenti seçilmiş Rəcəb Tayyib Ərdoğanın andiçmə mərasimi başlayıb. Mərasim Türkiyə Böyük Millət Məclisində keçirilib.
Ərdoğana prezidentlik mandatını Türkiyə Böyük Millət Məclisinə müvəqqəti sədrlik edən, ən yaşlı millət vəkili, MHP lideri Dövlət Baxçalı təqdim edib.
Sonra Ərdoğan and içib.
Andiçmənin ardından Türkiyənin "Millət marşı" səsləndirilib.
Azərbaycan Prezidenti İlham Əliyev tədbirdə iştirak edir.
R.T.Ərdoğan and içəndən sonra Anıtqəbiri ziyarət edəcək və ardınca onun vəzifəyə başlaması mərasimi keçiriləcək.
Türkiyə Prezidenti daha sonra Nazirlər Kabinetinin yeni tərkibini açıqlayacaq.
Xatırladaq ki, mayın 14-də baş tutan seçkilərdə prezidentliyə namizədlərdən heç biri 50 %-dən çox səs toplaya bilməyib.
Mayın 28-də keçirilən ikinci turda “Cümhur İttifaqı"nın prezidentliyə namizədi, hakim Ədalət və İnkişaf Partiyasının (AK Parti) sədri Rəcəb Tayyib Ərdoğan 52,18 faiz səslə qalib gəlib.
Qeyd edək ki, R.T.Ərdoğan 1954-cü ildə anadan olub. O, 2003-cü ildən 2014-cü ilədək Türkiyənin Baş naziri olub.
2014 və 2018-ci illərdə dövlət başçısı seçilib.