BAKI, 22 may — Sputnik. Azərbaycan Minatəmizləmə Agentliyi (ANAMA) işğaldan azad edilmiş ərazilərdə ötən həftə 31 mina aşkarlayıb.
ANAMA-dan verilən məlumata görə, mayın 15-dən 20-dək Tərtər, Ağdam, Xocavənd, Füzuli, Şuşa, Qubadlı, Cəbrayıl və Zəngilanda aparılan minatəmizləmə əməliyyatları zamanı piyada əleyhinə 17, tank əleyhinə 14 mina və 484 partlamamış hərbi sursat aşkarlanaraq zərərsizləşdirilib.
Nəticədə 213 hektar ərazi mina və partlamamış hərbi sursatlardan təmizlənib.
1991-ci ildən indiyədək mina və partlamamış hərbi sursatların partlaması nəticəsində ümumilikdə 3381 nəfər azərbaycanlı xəsarət alıb. Onlardan 358 nəfəri uşaq, 38 nəfəri isə qadındır.
Həmçinin 2020-ci il noyabr - 2023-cü il 16 may tarixləri arasında 141 mülki şəxsin minaya düşdüyü, bunlardan 44 nəfərinin həlak olduğu, 97 nəfərin isə yaralanaraq müxtəlif dərəcəli bədən xəsarətləri aldıqları qeyd olunub. 161 nəfər hərbi qulluqçu da mina və partlamamış hərbi sursatların qurbanı olublar. Bunlardan da 13 nəfəri həlak olub, 148 nəfər isə yaralanıb.minaya düşən şəxslərin 40 %-ni işğaldan azad edilən ərazilərdə öz ata-baba yurdlarını görmək həvəsilə qanunsuz səfər edənlər təşkil edir. Hadisələrdən 20 %-i mina ilə çirklənməyə məruz qalmış ərazilərdə infrastruktur işləri apararkən, 19%-i xidməti vəzifə və minatəmizləmə əməliyyatları zamanı, 21%-i isə kənd təsərrüfatı fəaliyyətilə məşğul olma nəticəsində baş verib.