BAKI, 21 may — Sputnik. Baş nazir Nikol Paşinyanın oğlu Aşotu qaçırmağa cəhddə ittiham olunaraq bir gün əvvəl həbs edilən Qayane Akopyanın bir qrup tərəfdarı gecəni ölkənin hökumət binası qarşısında keçirərək onun azadlığa buraxılmasını tələb edib. TASS müxbirinin hadisə yerindən verdiyi məlumata görə, etirazçılar əsasən 44 günlük müharibədə həlak olan hərbçilərin valideynlərini birləşdirən “Oğulların harayı” təşkilatının nümayəndələridir.
"Gecəni hökumət binasında Qayane Akopyanın azad edilməsi tələbi ilə keçirdik. O, günahkar deyil, bu, bizi susdurmaq üçün indiki hakimiyyətin siyasi sifarişidir. Qayane həbsdən azad olunana qədər biz burada qalacağıq", - etirazçılardan biri deyib.
Hazırda Ermənistan hökumət binasının qarşısındakı meydanda 20-yə yaxın adam var. Mitinq dinc xarakter daşıyır və onun iştirakçıları çadır qurmağa cəhd etmirlər. Ərazidə onlarla polis əməkdaşı xidmət edir. Onlar etirazçıların hərəkətlərinə mane olmurlar.
Çərşənbə günü Ermənistan Nazirlər Kabinetinin başçısının ailəsinə məxsus olan "Armtimes" qəzeti “Oğulların harayı” təşkilatının üzvlərinin baş nazirin oğlunu qaçırmağa cəhd etdiyini yazıb.
Qəzetin yazdığına görə, hücum edənlər onu zorla maşına mindirsələr də, o, sonradan qaça bilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.