BAKI, 20 may - Sputnik. Ermənistan Baş nazirinin oğlunun oğurlanmasını təşkil etməkdə ittiham olunan 44 günlük müharibədə həlak olan əsgərin anası Qayane Akopyan (Martirosyan) bir ay müddətinə həbs edilib.
Vəkil Vaan Hovhannisyanın sözlərinə görə, qərarı bu gün ümumi yurisdiksiya məhkəməsi elan edib.
"Məhkəmə həbsin qanuniliyi ilə bağlı şikayətimizi təmin etməyib və müstəntiqin həbslə bağlı vəsatətini təmin edib", - vəkil bildirib.
O qeyd edib ki, hakim Jora Çiçoyanın qərarından şoka düşüb, çünki proses zamanı həbs üçün heç bir əsasın olmadığı məlum olub.
Müdafiə tərəfi hökmdən apellyasiya şikayəti verəcək, lakin hələlik Qayane Akopyan (Martirosyan) aclıq aksiyasını davam etdirmək qərarına gəlib. Vəkil bildirib ki, hazırda onun səhhəti qənaətbəxşdir.
Baş nazirin oğlunun oğurlanmasını təşkil etməkdə təqsirləndirilən Qayane Akopyanın həbsi ilə bağlı məhkəmənin qərarından xəbər tutan həlak olan hərbçilərin valideynləri və onların tərəfdarları Arşakunyats prospektini bağlayıb və Yerevanın mərkəzinə, Respublika meydanına doğru yürüş ediblər.
İzdihamla polis arasında vaxtaşırı toqquşmalar olur. Müxalifət deputatları etirazçılarla polis arasında toqquşmanın qarşısını almağa çalışırlar. Valideynlər canlı divar düzəldərək yürüşə rəhbərlik edirlər.
Ölən Mxitar Qaleyanın atası Qarik Qaleyan vaxtaşırı aksiyanın dinc xarakter daşıdığını elan edir. O, mitinq iştirakçılarını təxribatlara cavab verməməyə və polisi incitməməyə çağırır.
Xatırladaq ki, ölən əsgər Jora Martirosyanın anası baş nazir Nikol Paşinyanın oğlu Aşotu qaçırmaqda şübhəli bilinərək mayın 17-də saxlanılıb. Qadın günahını etiraf etmir və buna etiraz olaraq aclıq aksiyasına başlayıb.
Akopyanın müdafiə tərəfi əvvəllər həbs əvəzinə bir və ya bir neçə alternativ qabaqlayıcı tədbirin görülməsini xahiş etmişdi. Xüsusilə, söhbət “Yerablur” hərbi qəbiristanlığına mütəmadi olaraq baş çəkmək imkanı şərti ilə ev dustaqlığından; Aşot Paşinyanla və lazım gələrsə, işdə iştirak edən digər şəxslərlə ünsiyyətə qadağa qoyulması; deputatların və ictimai xadimlərin girovu və zəmanətindən gedir.
Xatırladaq ki, Aşot Paşinyanın bəyanatı əsasında “insan oğurluğu” maddəsi ilə cinayət işi başlanıb. İstintaq qeyd edir ki, “Oğulların çağırışı” təşkilatının üzvləri kiçik Paşinyanı maşınlarına minməyə məcbur ediblər, lakin o, tullana bilib və bu zaman onu başqa maşın vurub.
“Oğulların çağırışı” təşkilatı adam oğurluğu ittihamını rədd edib. Onların sözlərinə görə, kiçik Paşinyan könüllü olaraq ölən əsgərin anasının maşınına minib və İrəvandakı “Yerablur” hərbi qəbiristanlığına getməyə razılaşıb. Sonra yolda maşından düşüb. Hadisədən dərhal sonra dörd valideyn saxlanılıb, daha sonra Qayane Akopyan (Martirosyan) istisna olmaqla, hamısı buraxılıb.