BAKI, 18 may — Sputnik. Tezliklə Ermənistanla Azərbaycan arasında sülh müqaviləsinin imzalanacağına ümid edirik. Bunu Kollektiv Təhlükəsizlik Müqaviləsi Təşkilatının (KTMT) Baş katibi İmanqali Tasmaqambetov KTMT Parlament Assambleyası (KTMT PA) Şurasının iclasında iştirak etmək üçün Belarusun paytaxtı Minskə səfəri çərçivəsində jurnalistlərə açıqlamasında bildirib.
Tasmaqambetov qeyd edib ki, Cənubi Qafqaz regionundakı vəziyyətlə bağlı mütəmadi danışıqlar aparılır və bu yaxınlarda Avropada daha bir görüş baş tutub.
KTMT rəhbəri onu da vurğulayıb ki, həm Azərbaycan, həm də Ermənistan tərəfi praktiki olaraq 1991-ci il "Alma-Ata bəyannaməsi"nə əsasən iki ölkə arasındakı sərhədləri tanıyır.
Xatırladaq ki, bir müddət öncə Rusiya Xarici İşlər Nazirliyinin rəsmi nümayəndəsi Mariya Zaxarova bildirib ki, KTMT missiyasının regiona göndərilməsi Ermənistandan asılıdır.
Onun sözlərinə görə, Rusiya tərəfi Ermənistanın KTMT missiyasını qəbul etməkdə marağının olmasından məmnundur.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.