BAKI, 4 may — Sputnik. Bərdədə heroin alveri ilə məşğul olan silahlı dəstə saxlanılıb.
Daxili İşlər Nazirliyindən verilən məlumata görə, Bərdə Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri ilə rayon sakinləri Pərviz Bədirov, Sərdar Talıbov, Vüsal Məmmədov və qardaşı Pərviz saxlanılıblar.
Şəxsi axtarış zamanı onlardan müxtəlif çəkidə heroin və marixuana aşkar olunub.
Davam etdirilən tədbirlərlə Pərviz Məmmədovun yaşadığı evə baxış zamanı oradan da heroin və qanunsuz saxladığı "TOZ-16" markalı ov tüfəngi aşkar olunaraq götürülüb. Araşdırma aparılır.
Qeyd edək ki, DİN-in 2022-ci ilə dair illik hesabatına görə, qeyri-leqal dövriyyədən 2021-ci illə müqayisədə 373 kq çox və ya 3 ton 418 kiloqram narkotik vasitə çıxarılıb. Ötən il ümumi çəkisi 172 ton 753 kiloqram olan narkotik tərkibli bitki yaşıl kütlə halında məhv edilib, 1 ton 150 kq narkotikin qaçaqmalçılıq yolu ilə ölkəyə gətirilməsinin qarşısı alınıb.