BAKI, 19 aprel — Sputnik. Rusiyanın Avropadakı enerji obyektlərində guya təxribat hazırlaması ilə bağlı Qərb mətbuatında yayılan xəbərlər yalandır və Qərb mətbuatına "Şimal axını"nda terror aktlarının araşdırılması zərurətinə daha çox diqqət yetirməyi təklif edirik. Bunu Rusiya Federasiyası Prezidentinin mətbuat katibi Dmitri Peskov bildirib.
"Adları çəkilən ölkələrin (Danimarka, İsveç, Norveç, Finlandiya) KİV-ləri araşdırmalarında səhvə yol veriblər, onlar yenə də əsassız olaraq hər şeydə Rusiyanı günahlandırmağa üstünlük verirlər", - Peskov jurnalistlərə bildirib.
"Biz onların "Şimal axını"nda terror aktı mövzusuna, bu misli görünməmiş terror aktlarının, təxribatın şəffaf, təcili və geniş beynəlxalq təhqiqatının zəruriliyinə daha çox diqqət yetirməsini arzu edərdik", - Kreml sözçüsü vurğulayıb.
Bundan əvvəl bəzi Qərb KİV-ləri Danimarka, Norveç, İsveç və Finlandiyada KİV-lərin araşdırması ilə bağlı nəşrlər dərc ediblər. Onlar iddia edirlər ki, Rusiyanın Avropadakı enerji obyektlərində, xüsusən də külək stansiyalarında təxribat törətmək planları var.
2022-ci ilin sentyabrın 26-da Rusiyanın Avropa istiqamətindəki iki qaz kəmərinə - "Şimal axını" və "Şimal axını 2"yə hücumlar baş verib. Almaniya, Danimarka və İsveç hədəflənmiş təxribatı istisna etmir. "Şimal axını"nın operatoru "Nord Stream AG" qaz kəmərlərində fövqəladə vəziyyətin görünməmiş olduğunu və təmir vaxtını təxmin etməyin mümkün olmadığını bildirib. Rusiya Federasiyasının Baş Prokurorluğu "Şimal axını" qaz kəmərlərinə dəyən ziyandan sonra beynəlxalq terror aktı ilə bağlı cinayət işi açıb.