BAKI, 19 aprel — Sputnik. Dünya birjalarında neft qiymətləri ucuzlaşıb.
London birjasında "Brent" markalı neftin bir barelinin qiyməti 0,31 dollar azalaraq 84,46 dollar olub. Nyu-York birjasında "Light" markalı neftin bir barelinin qiyməti isə 0,29 dollar ucuzlaşaraq 80,57 dollar təşkil edib.
Azərbaycan neftinin 1 barelinin qiyməti 0,01 dollar artaraq 88,60 dollar təşkil edib.
Qeyd edək ki, dünyada neft qiymətləri bir qədər ucuzlaşmaqdadır. Çünki bazarlar tələbat perspektivlərini qiymətləndirməyə davam edirlər.
Neft bazarına həmçinin maliyyə bazarındakı vəziyyət təsir göstərir. Yaxın zamanda dünyanın ən böyük tənzimləyicilərinin yeni iclasları keçiriləcək, investorlar isə monetar siyasətin daha da sərtləşdirilməsinin perspektivlərini qiymətləndirəcəklər. Ötən il faiz dərəcələri inflyasiya ilə mübarizə çərçivəsində artmağa başlayıb.
Bununla belə, Amerika Neft İnstitutunun (API) qiymətləndirməsinə əsasən, ABŞ-də bu xammalın kommersiya ehtiyatları aprelin 14-dək olan həftə ərzində 2,7 milyon barel azalıb. Rəsmi statistika çərşənbə günü axşam ölkənin Energetika Nazirliyi tərəfindən dərc olunacaq. Analitiklər ehtiyatların 1,1 milyon barel azaldığını proqnozlaşdırırlar.
Xatırladaq ki, 2022-ci ildə "Azeri Light" markalı neftin bir barelinin orta satış qiyməti 103,58 ABŞ dolları təşkil edib. 2021-ci ilin göstəricisi ilə müqayisədə ötən il "Azeri Light" nefti 44,6% bahalaşıb.
2022-ci il ərzində "Azeri Light" markalı neftin ən yüksək qiyməti 8 mart tarixində bir barel üçün 135,99 ABŞ dolları, ən aşağı qiyməti isə 8 dekabr tarixində 78,07 ABŞ dolları olub.