BAKI, 16 mart — Sputnik. "Şimal axını 1" və "Şimal axını 2" qaz kəmərlərinin Ukraynayönlü qrup tərəfindən partladılması versiyası "axmaq hekayədir".
Bu fikri amerikalı publisist Seymur Herş Vaşinqtonda ictimaiyyət qarşısında çıxışı zamanı deyib.
O əlavə edib ki, boru kəmərinin təxribatının tarixi haqqında danışa biləcəyindən daha çox nələrsə bilir. Herşin sözlərinə görə, o, sadəcə olaraq bu barədə danışa bilməz.
Publisist qeyd edib ki, ABŞ-ın hazırkı Prezidenti Co Bayden "özünün kəşfiyyat təşkilatını itirib". Onun sözlərinə görə, Ukraynayönlü qrupun boru kəmərlərinin partladılmasında mümkün iştirakı ilə bağlı "bu sərsəm hekayəni" Qərb mətbuatına "həzm etdirən" məhz Amerika kəşfiyyat orqanları olub. Herş izah edib ki, hansısa "həvəskar fəallar" bu dərəcədə mürəkkəb əməliyyatı həyata keçirə bilməzdilər.
Bundan əvvəl amerikalı publisistin boru kəmərlərinin partladılmasının ABŞ-ın gizli əməliyyatı olduğunu bildirən məqalə dərc etdirdiyi xəbər verilmişdi. Lakin Ağ Evdə bu versiyanı "tam yalan" adlandırıblar.
Keçən həftə "The New York Times" qəzeti Amerika rəsmilərinə istinadən, guya "Ukraynayönlü qrup"un ABŞ hakimiyyətinin xəbəri olmadan qaz kəmərlərində təxribat törədə biləcəyini yazıb.