BAKI, 20 fevral — Sputnik. Neft qiymətləri həftəyə yüksəlişlə başlayıb. London birjasında "Brent" markalı neftin qiyməti 0,67 dollar artaraq 83,67 dollar, Nyu-York birjasında "Light" markalı neftin qiyməti isə 0,53 dollar bahalaşaraq 76,87 dollar təşkil edib.
Ötən həftəni ucuzlaşma ilə başa vuran neft qiymətləri həftəyə bahalaşma ilə başlayıb. Səbəb Çində tələbin artacağına dair gözləntilər olub. Belə ki, ötən həftə Çin rəsmiləri COVID-19 üzərində "həlledici qələbə" qazandıqlarını elan ediblər. Bazarlarda ABŞ Mərkəzi Bankından (FED) gələn mesajlar və Çindəki neftə tələb proqnozu diqqətlə izlənib.
FED-in inflyasiya ilə mübarizə aparmaq üçün pul siyasətini daha da sərtləşdirməsi ehtimalı neft qiymətlərini məhdudlaşdırsa da, Çinin neft tələbində canlanma olduğu məlumatları yayılmaqdadır.
Xatırladaq ki, keçən həftənin sonunda “Azeri Light” markalı neftin qiyməti 2,14 dollar azalaraq 85,34 dollar olub.
Azərbaycanın builki dövlət büdcəsində bir barel neftin orta qiyməti 50 ABŞ dollarından hesablanıb.
"Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.