BAKI, 16 fevral — Sputnik. Dövlət Dumasının sədri Vyaçeslav Volodin ABŞ-ın "Şimal axını"nda törətdiyi təxribat nəticəsində dəyən ziyanın dəqiq məbləğinin öyrənilməsini və bu pulun qaytarılmasını zəruri hesab edir.
Bu barədə "RİA Novosti" məlumat yayıb.
"Həmkarlar, gəlin ziyanı hesablayaq, onu sizinlə müzakirə edərək təqdim edək", - deyə deputat öz parlament yoldaşlarına müraciət edib.
Onun sözlərinə görə, Qərb qaz kəmərlərinin partladılması zamanı təbiətə "böyük ziyan vurduğunu" nəzərə almır.
Bundan əvvəl Çin Xarici İşlər Nazirliyinin sözçüsü Vanq Venbin bildirib ki, Çin "Şimal axını"nda törədilən partlayışlarla bağlı obyektiv və peşəkar araşdırma aparılmasının tərəfdarıdır. O, bu hadisəni törədənlərin cəzalandırılmasının vacibliyinə də işarə edib.
Xatırladaq ki, ötən il sentyabrın sonunda Rusiyanın Avropaya ixrac etdiyi iki qaz kəməri - "Şimal axını" və "Şimal axını 2" hücuma məruz qalıb. Bir sıra Avropa ölkələri bunun məqsədyönlü təxribat olduğunu etiraf ediblər. Rusiya Federasiyasının Baş Prokurorluğu beynəlxalq terror aktı ittihamı ilə bağlı iş açıb.