BAKI, 4 fevral - Sputnik. Ağ Evin rəhbəri Co Bayden şənbə günü deyib ki, ABŞ administrasiyası Amerika hava məkanında Çinə məxsus hava şarının olması ilə bağlı vəziyyətlə "mübarizə aparmaq" niyyətindədir.
"Biz bununla məşğul olacağıq" dedi Bayden, hazırkı vəziyyətlə bağlı jurnalistlərin sualını cavablandırarkən. Dövlət başçısı bununla nə demək istədiyini açıqlamayıb.
Pentaqonun sözçüsü daha əvvəl ABŞ səmasında kəşfiyyat balonunun göründüyünü bildirib. O, Aleut adalarından Kanada ərazisi ilə uçaraq Montana ştatına çatıb. Balonun hərəkətləri Şimali Amerika Aerokosmik Müdafiə Komandanlığı (NORAD) tərəfindən izlənilir. ABŞ ordusu hava şarının Çinə məxsus olduğuna inanır. İddialara görə, onlar məskunlaşan ərazilərə düşmək riski olduğundan zondu vurmağa cəsarət etməyiblər.