BAKI, 2 fevral — Sputnik. Daxili İşlər Nazirliyi Qərbi azərbaycanlılara müraciət edib. Sputnik Azərbaycan-ın Lent.az-a istinadən verdiyi məlumata görə, nazirliyin müraciətində qeyd edilir ki, artıq Qərbi azərbaycanlılar doğulduqları yerləri təsdiq etdirə bilərlər.
Belə ki, sovet pasportları şəxsiyyət vəsiqələri ilə əvəz olunduqdan sonra öz etibarlılığını itirib. Həmin pasportlar müvafiq qaydada məhv edilib. Doğum haqqında şəhadətnamələr isə vətəndaşların özlərində qalır.
İstənilən şəxs, o cümlədən Qərbi azərbaycanlılar doğulduqları yeri təsdiq etdirmək üçün həmin şəhadətnaməni DİN-in Baş Pasport, Qeydiyyat və Miqrasiya İdarəsinə təqdim edə bilərlər. Mütəxəssislər hesab edirlər ki, hazırda bu şəhadətnamələr soydaşlarımızın öz torpaqlarına qayıtmasını təmin etmək, eləcə də təzminat məsələlərində beynəlxalq məhkəməyə təqdim olunacaq əsas sənədlərdir.
Qeyd edək ki, Qərbi Azərbaycana Qayıdış Konsepsiyası üzrə işlər yekunlaşmaq üzrədir. İdarə Heyəti ilə yanaşı, digər orqanlar sənədin hazırlığında fəal iştirak edirlər. Xatırladaq ki, Azərbaycan Prezidenti İlham Əliyev dekabrın 24-də Qərbi Azərbaycan İcmasının inzibati binasında yaradılan şəraitlə tanış olub və Qərbi Azərbaycandan olan bir qrup ziyalı ilə görüşüb.