Bu gün ölkəmizin İrandakı səfirliyinə silahlı hücum nəticəsində şəhid olmuş Mühafizə xidmətinin rəisi Orxan Əsgərovla vida mərasimi keçirilib. Mərhumla vida mərasimi onun Yasamal rayonundakı mənzilində baş tutub.
Şəhidlə vida mərasiminə millət vəkilləri, dövlət xadimləri, Daxili İşlər Nazirliyinin əməkdaşları, ictimaiyyət nümayəndələri və qazilər qatılıb. Doğmaları Şəhid Orxan Əsgərovun cənazəsi ilə vidalaşdıqdan sonra onun nəşi II Şəhidlər Xiyabanına gətirilib. Mərhumun xatirəsinə ehtiram əlaməti olaraq 3 dəfə yayılım atəşi açılıb, Azərbaycanın Dövlət Himni səsləndirilib.
Şəhid Orxan Əsgərov İkinci Şəhidlər xiyabanında dəfn edilib. Dəfn mərasimində DİN rəhbəri Vilayət Eyvazov, müdafiə naziri Zakir Həsənov, müdafiə sənayesi naziri Mədət Quliyev, DTX başçısı Əli Nağıyev iştirak edib.
Qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İrandakı səfirliyinə silahlı hücum olub. Hücum edən şəxs avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib.
Səfirliyin mühafizə xidmətinin iki əməkdaşı hücumun qarşısını alarkən yaralanıb. Onların vəziyyəti qənaətbəxşdir. Öldürülən baş leytenant O.Əsgərov Gəncə şəhər 1 nömrəli Birləşmiş Uşaq Xəstəxanasının baş həkimi Rizvan Əsgərovun oğludur. Onun iki övladı var.