BAKI, 24 yanvar — Sputnik. Rusiya Federasiyasında müəyyən müddət ərzində, xüsusən də payız-qış dövründə ən çox tələb olunan dərmanların ehtiyatını təmin etmək lazımdır ki, bazarda ajiotaj olmasın. Bunu Rusiya Prezidenti Vladimir Putin hökumət üzvləri ilə görüşündə deyib.
"Müəyyən müddət ərzində ən çox tələb olunan dərmanların ehtiyatını təmin etmək lazımdır. Biz payız-qış dövrünü keçəndə ən böyük qaz hasil edən ölkələrdən biri olmaqla yanaşı, həm də kəskin payız-qış dövrünün keçməsi üçün yeraltı anbarlara qaz vururuq. Ticarət şəbəkələrində ən çox tələb olunan əsas məhsullar üçün bir sıra digər mövqelərdə də eyni şeyi edirik", - deyə prezident bildirib.
Putin qeyd edib ki, əczaçılıqda özünəməxsus xüsusiyyətlər var, lakin yanaşma eyni ola bilər.
"Bu qrip dövrünün belə keçməsini tam təmin etmək mümkündür, çünki hamımız bilirik ki, bu zaman qızdırma salıcı dərmanlar, antibiotiklər və s. preparatlar tələb olunur. Müəyyən ehtiyatın vaxtında formalaşdırılmasına heç nə mane olmur", - deyə dövlət başçısı vurğulayıb.
Putinin sözlərinə görə, bu, bir çox insanın həyatını asanlaşdıracaq və bazarda heç bir ajiotaj yaratmayacaq.
"Bu sahədə, istər Sənaye Nazirliyində, istərsə də Səhiyyə Nazirliyində çalışan hər kəsdən bu barədə düşünməyi xahiş edirəm və ümid edirəm ki, müvafiq təkliflər veriləcək və onlar həyata keçiriləcək", - deyə prezident əlavə edib.