BAKI, 5 yanvar — Sputnik. Bayram günlərində TƏBİB-in tabeliyindəki Bakı Şəhəri Təcili və Təxirəsalınmaz Tibbi Yardım Stansiyası 7/24 gücləndirilmiş iş rejimində xidmət göstərib. Bu barədə TƏBİB-dən məlumat verilib.
Bildirilib ki, 103 Çağrı mərkəzində və bölmələrdə məsul şəxslərdən ibarət növbətçilik təşkil olunub.
Təcili tibbi yardım xidmətinə 31.12.2022-04.01.2023 tarixləri ərzində ümumi çağırışların sayı 14 059, hospital olunanların sayı isə 1 307 olub.
Çağırışların sayı ən çox 01.01.2023 (çağırış sayı 2 867, hospital olunanların sayı 284 olmaqla) və 03.01.2023 (çağırış sayı 2 951, hospital olunanların sayı 285 olmaqla) tarixində qeydə alınıb.
Çağırış səbəbləri əsasən arterial təzyiqin qalxması, kardioloji problemlər, travmalar, dispeptik əlamətlər, respirator xəstəliklər və s. ilə bağlı olub.