BAKI, 16 dekabr — Sputnik. Azərbaycan Meliorasiya və Su Təsərrüfatı Açıq Səhmdar Cəmiyyəti Ağdam rayonundakı Xaçınçay su anbarına media-tur təşkil edib.
İşğaldan azad olunan əraziyə səfər edən jurnalistlərə Xaçınçay su anbarı barədə məlumat verilib. Qeyd olunub ki, Xaçınçay su anbarının 7 kilometr uzunluğunda olan kanalla birlikdə su anbarı bəndinin beton üzlüyünün üzərindəki köhnə beton qaşınaraq təmizlənir, sınmış üzlük tavaları dağıdılaraq çıxarılıb yenidən tamamilə betonla üzlənir.
Bəndin üstündə abadlaşdırma işləri aparılacaq. Bəndin sol yamacında yeni istinad divarının inşası nəzərdə tutulub. Qülləli suburaxıcı qurğunun və su aparan borusunu divarlarını beton üzlükləri təmir olunaraq, hidromexaniki avadanlıqları təmir olunaraq yenilənəcək.
Şaxtavari suaşıranın dib və divarları betonla üzlənəcək, su anbarından su aparan beton kanalın beton üzlüyü və üzərindəki qurğular təmir olunaraq yenilənəcək. Xaçınçay su anbarında yeni inzibati binanın və təmir emalatxanasının tikintisi də nəzərdə tutulub.
Qeyd edək ki, Xaçınçay su anbarı 1964-cü ildə istismara verilib. Su anbarının suvarma məqsədli, uzunluğu 7 km, su sərfi 3m3/san olan kanalının təmiri və bərpası nəzərdə tutulub.