BAKI, 23 noyabr — Sputnik. Dünya birjalarında neft qiymətləri ucuzlaşıb.
London birjasında "Brent" markalı neftin qiyməti 0,16 dollar azalaraq 88,2 dollar, Nyu-York birjasında "Light" markalı neftin qiyməti isə 0,12 dollar ucuzlaşaraq 80,83 dollar olub.
Azərbaycan neftinin qiyməti isə bahalaşıb. “Azeri Light” markalı neftin bir barelinin qiyməti 5,9 dollar artaraq 91,09 dollar olub.
Qeyd edək ki, Çində davam edən koronavirus məhdudiyyətlərinə görə neft ucuzlaşıb. Bazarlar Çində koronavirusla bağlı vəziyyətin pisləşməsinə və Çin iqtisadiyyatına, eləcə də dolayı yolla neftə olan tələbə mənfi təsir göstərən koronavirus məhdudiyyətlərinə diqqət yetirir. Digər tərəfdən, ötən həftənin yekunlarına görə, ABŞ-ın kommersiya neft ehtiyatları azalıb.
Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb.
Azərbaycanın builki dövlət büdcəsində bir barel neftin orta qiyməti 85 dollardan götürülüb.