Argentina millisinin Səudiyyə Ərəbistanı yığmasına uduzması (2:1) Qətərdə keçirilən 2022-ci il futbol üzrə dünya çempionatının start günlərinin əsas sensasiyası olub.
Argentinalılar artıq görüşün 10-cu dəqiqəsində fərqləniblər - Lionel Messi penaltidən fərqlənib. Üstəlik, görüşün ilk yarısında argentinalılar səudiyyəlilərə daha üç dəfə zərbə endiriblər, lakin VAR sistemi dəfələrlə ofsayd vəziyyətini müəyyənləşdirib və qollar ləğv edilib. İkinci hissənin əvvəlində isə Səudiyyə Ərəbistanı beş dəqiqə ərzində iki qol vuraraq bütün Argentinanı və onun azarkeşlərini şoka saldı.
Messi və şirkət hakimin əsas vaxta əlavə etdiyi 14 dəqiqəyə baxmayaraq, məğlubiyyətdən yaxa qurtara bilməyib.
Təbii ki, oyundan sonra Səudiyyə Ərəbistanı millisinin azarkeşlərinin sevincinin həddi-hüdudu yox idi. Eyni zamanda, hətta Kriştiano Ronaldonun üslubunda Argentina yığmasını ələ salaraq, “Leo, sən haradasan?” və "Növbəti kimdir?" qışqırıblar.
Yeri gəlmişkən, Argentina millisi üzərində qələbənin Səudiyyə Ərəbistanı üçün böyük əhəmiyyət kəsb etdiyini noyabrın 23-nün ölkədə istirahət günü elan edilməsi də sübut edir. Çərşənbə günü burada şirkətlər, dövlət qurumları, təhsil müəssisələri işləmir.
Səudiyyəlilərdən məğlubiyyət təkcə Argentina millisinin azarkeşlərini deyil, həm də futbolçuların özlərini şoka salıb. Bu barədə oyundan sonra Leo Messinin özü məlumat verib.
"Hamımız üçün bu ağır zərbədir, heç kim belə bir başlanğıc gözləmirdi. Məğlubiyyətimiz üçün heç bir bəhanə yoxdur", - Messi deyib.
İndi qrupdan vəsiqə qazanmaq üçün Argentina millisi geridə qalan iki görüşdə Meksika və Polşa komandalarına qalib gəlməlidir.