BAKI, 12 noyabr — Sputnik. Bu gün Nardaran "ABAD" Keramika və Tətbiqi Sənət Mərkəzinə media tur təşkil olunub. Mərkəz haqqında jurnalistlərə məlumat verən Nardaran "ABAD" Keramika və Tətbiqi Sənət Mərkəzininin direktoru Rüfət Elçiyev bildirib ki, Nardaran "ABAD" Keramika və Tətbiqi Sənət Mərkəzində keramika sənəti üzrə ustad dərsləri və təlimlər keçirilir.
"ABAD" publik hüquqi şəxsin yaratdığı keramika mərkəzləri ölkəmizin, eləcə də regionun unikal bir yaradıcılıq platformasıdır:
"2018-2019-cu illərdə "PAŞA Holding"in dəstəyi ilə inşa edilən Nardaran "ABAD" Keramika və Tətbiqi Sənət Mərkəzi Türk Əməkdaşlıq və Koordinasiya Agentliyi tərəfindən zəruri mal-material və avadanlıqlarla təchiz edilərək istifadəyə verilib".
Direktor vurğulayıb ki, mərkəzin məqsədi ölkəmizin tarixi keramika ənənələrinin gələcək nəsillərə ötürülməsi, Azərbaycan dilinin dünyada tanıdılması və gənclər arasında məşğulluğun artırılmasıdır:
Nardaran "ABAD" Keramika və Tətbiqi Sənət Mərkəzi
© Sputnik / Shahperi Abbasova
"Mərkəzin müxtəlif profilli avadanlıqla təchiz edilməsi digər keramika sənətkarları və həvəskarları üçün məhsulların bişirilmə və s. proseslərini ərsəyə gəlməsinə dəstək verir. Hazırda Mərkəzdə on əməkdaş daimi iş yeri ilə təmin edilib. Onlar tərəfindən hər ay yüzlərlə müxtəlif çeşidli məhsul istehsal edilərək satışa çıxarılır".
Türk Əməkdaşlıq və Koordinasiya Agentliyinin (TİKA) Azərbaycana təyin olunmuş Koordinatoru Fatih Yılmaz bildirib ki, sözügedən mərkəz Azərbaycanın ən qədim sənətlərini özündə birləşdirib. Mərkəzin açılması həm qədim sənətlərin inkşafına, həm də yerli əhalinin, xüsusilə də qadınların işlə təmin olunmasına zəmin yaradacaq:
Nardaran "ABAD" Keramika və Tətbiqi Sənət Mərkəzi
© Sputnik / Shahperi Abbasova
"Biz 1994-cü ildən Azərbaycanla iqtisadi əlaqələr qururuq. Müxtəlif sahələr üzrə 200-dən artıq layihələrdə birlikdə çalışdıq. Layihələri həyta keçirərkən əsas dəstəyi rəsmi qurumlardan alırıq. Buradakı sənətkarlıq mərkəzinin də yaradılmasında biz iştirak edirik. Bu mərkəz həm də qadınların işlə təmin olunması üçün əlverişlidir. Bura həm də sənət ocağıdır. Çünki, sənətkarlar burada öz xəyal dünyalarını gerçəkləşdirə bilərlər.
Nardaran "ABAD" Keramika və Tətbiqi Sənət Mərkəzi
© Sputnik / Shahperi Abbasova
Qeyd edək ki, Mərkəzdə yaradılmış şəraitdən və "ABAD" xidmətlərindən yararlanmaqla "ART Factory" adlı yeni "ABAD"çı müəssisə formalaşıb. "ABAD"çı burada müxtəlif dekorativ əşya və suvenirlər, məişətdə istifadə üçün keramika məhsulları istehsal edir.