BAKI, 10 noyabr — Sputnik. "Rusiya lideri Vladimir Putinlə etibarlı münasibət qurulub, bunsuz Rusiyanın "ərzaq müqaviləsi"ndə iştirakını bərpa etmək mümkün olmazdı". Bunu Türkiyə Prezidenti Rəcəb Tayyib Ərdoğan deyib.
"Bu, hörmətli cənab Putinlə həyata keçirdiyimiz siyasətdir. Təbii ki, etimad münasibətləri olmasaydı, bu mümkün olmazdı. Bir-birimizə olan etibarlı münasibət və hörmət bizi bu cür qərarlar verməyə sövq edir. AES-in (Akkuyu, Sinop) inşası da daxil olmaqla, müdafiə mövzusuna dair suallar, ümumiyyətlə bütün məsələlər bizim etibarlı münasibətlərimizə əsaslanır", - deyə Ərdoğan Rusiyanın "ərzaq müqaviləsi"ndə iştirakını bərpa etməsini şərh edərkən bildirib.
İyulun 22-də Rusiya, Türkiyə, Ukrayna və BMT nümayəndələri tərəfindən imzalanan saziş Ukrayna taxılının, ərzaq məhsullarının və gübrələrinin Qara dəniz vasitəsilə Odessa da daxil olmaqla üç limandan ixracını nəzərdə tutur. İstanbuldakı Birgə Koordinasiya Mərkəzi gəmilərin hərəkətinin koordinasiyasına cavabdehdir. Müqavilənin müddəti noyabrın 19-da başa çatır.
Oktyabrın 30-da Kiyevin Qara dəniz donanmasının gəmilərinə və Sevastopol sularında mülki gəmilərə hücumundan sonra Rusiya Ukrayna limanlarından məhsulların ixracında iştirakının dayandırıldığını elan edib.
Daha sonra Rusiya Müdafiə Nazirliyi Rusiyanın ərzaq müqaviləsində iştirakını bərpa etdiyini açıqlayıb. Kremldən verilən məlumata görə, Kiyevin "taxıl sazişi" üzrə humanitar dəhlizlərdən hərbi məqsədlər üçün istifadə etməyəcəyinə dair zəmanət verdiyi barədə məlumat Rusiya Müdafiə Nazirliyi vasitəsilə əldə edilib.