BAKI, 28 oktyabr — Sputnik. Türkiyə Silahlı Qüvvələri Azərbaycanın haqlı mübarizəsini dəstəkləyir.
Bu barədə Türkiyə milli müdafiə naziri Hulusi Akarın 29 Oktyabr Cümhuriyyət Gününə həsr olunmuş təbrik mesajında deyilir.
Akar əlavə edib ki, Azərbaycanla yanaşı, TSQ Şimali Kipr Türk Respublikası, Liviyada, həmçinin, digər coğrafiyalarda da sülh və stabilliyin təminatına töhfə verir.
Onun sözlərinə görə, Türkiyə artıq fəal və qüdrətli, təsir və maraq dairəsi günü-gündən genişlənən, regionda və dünyada söz sahibi olan bir dövlətdir.
Bir neçə gün əvvəl Türkiyə milli müdafiə naziri Hulusi Akar azərbaycanlı həmkarı Zakir Həsənovla görüşünüdə deyib: "Ermənistanın təxribatlarından əl çəkməsi, diqqəti sülh danışıqlarına və Azərbaycanla barışıq çərçivəsində əməkdaşlığa yönəltməsi, sülh əlini tutması zəruridir. Türkiyə bu günə qədər olduğu kimi bundan sonra da azərbaycanlı qardaşları ilə bir yumruq olacaq".