BAKI, 17 oktyabr — Sputnik. Çin hakimiyyəti ölkədə istilik mövsümünü təmin etmək üçün ölkədəki iri dövlət şirkətlərinə mayeləşdirilmiş təbii qazı Avropa və digər Asiya ölkələrindəki alıcılara təkrar satmağı qadağan edib. Bu barədə "Bloomberg" yazıb.
Materialda deyilir ki, inkişaf və islahatlar üzrə Milli Komissiya "PetroChina Co", "Sinopec" və "Cnooc Ltd." şirkətlərinə resursları daxili istifadə üçün saxlamağı əmr edib. Dövlət şirkətləri və tənzimləyici hələlik bu məlumatı şərh etməyiblər.
Bununla yanaşı, "Bloomberg"in mənbələri hesab edir ki, Pekinin bu cür addımları Avropaya mayeləşdirilmiş təbii qazın (MTQ) tədarükünün azalmasına və orada enerji böhranının kəskinləşməsinə gətirib çıxara bilər.
Bundan əvvəl KİV Rusiya Federasiyasından tədarükün dayandırılacağı təqdirdə Avropadakı qaz ehtiyatlarının 2023-cü ilin yanvarında bitə biləcəyini yazmışdı. "Qazprom" hesab edir ki, mavi yanacağa qiymət tavanının tətbiqi tədarükün dayandırılmasına səbəb olacaq.