BAKI, 14 oktyabr — Sputnik. Ötən tədris ilində Bakının Qaradağ rayonunda məktəbyaşlı qızlar arasında erkən nikah halları daha çox müşahidə olunub.
Bu barədə Bakı Şəhəri üzrə Təhsil İdarəsinin müdiri Mehriban Vəliyeva "Uşaq müdafiəsi: dialoq mühiti və qurumlararası əməkdaşlıq" mövzusunda keçirilən konfransda çıxışı zamanı deyib.
Onun sözlərinə görə, bu gün məktəbyaşlı qızların erkən nikaha cəlb edilməsi narahatlıq doğuran məsələlərdəndir: "Ötən ilin statistikası onu deməyə əsas verir ki, Qaradağ rayonunda erkən nikah halları daha çox müşahidə olunub".
M.Əliyeva həmçinin ötən tədris ilində 27 şagirdi məktəbdən kənarda avtomobilin vurduğunu da söyləyib: "Bu da o deməkdir ki, məktəblərin yaxınlığında yol şəraiti ilə bağlı aidiyyəti qurumlarla danışıqlar aparılır".
Mehriban Vəliyeva dərsliklərlə bağlı problemə də toxunub. Bildirib ki, sentyabr ayının əvvəlində qısa dövr ərzində məktəblərdə dərsliklərin təminatı ilə bağlı problem yaranmışdı. Amma artıq həmin məsələ öz həllini tapıb və dərslik çatışmazlığı ilə bağlı problem yoxdur.