BAKI, 9 oktyabr - Sputnik. Türkiyənin İstanbul şəhərində yaşayış binasında baş verən partlayış nəticəsində 3 nəfər həlak olub.
Bunu şəhərin valisi Əli Yerlikaya bildirib.
Yerlikaya "Twitter" hesabında yazıb:
"Təəssüf ki, təbii qazın sızması zamanı baş verən partlayış nəticəsində 3 nəfər həlak olub. Binada axtarış əməliyyatları davam edir".
***
Türkiyənin İstanbul şəhərinin Kadıköy rayonunda yaşayış binasında güclü partlayış olub.
Sputnik Türkiyə xəbər verir ki, ilkin məlumata görə, partlayış Kadıköydə Fikirtepe Məhəlləsindəki Erdemler küçəsində üçmərtəbəli binanın 3-cü mərtəbəsində təbii qaz sızması nəticəsində baş verib.
Partlayışdan sonra binada yanğın baş verib, partlayışın şiddəti ətrafdakı binalara və bəzi avtomobillərə ziyan vurub. Yanan binadan xəsarət almış bir nəfər çıxarılıb.
Hadisə yerinə çoxlu sayda yanğınsöndürən, polis və tibb işçiləri göndərilib. Yanğın yanğınsöndürənlər tərəfindən nəzarətə götürülüb. Qruplar binada soyutma işlərinə başlayıb.
Yanan binada xəsarət alan 1 nəfər xəstəxanaya çatdırılıb. Partlayışın təbii qazın sızması nəticəsində törədildiyi iddia edilsə də, səbəbi araşdırılır.