BAKI, 4 oktyabr — Sputnik. Gürcüstandan Azərbaycana qanunsuz keçmək istəyən 7 azyaşlı saxlanılıb.
Bu barədə Dövlət Sərhət Xidməti məlumat yayıb.
Belə ki, oktyabrın 3-də saat 03:30-da DSX-nin Sərhəd Qoşunlarının "Şəmkir" sərhəd dəstəsinin Ağstafa rayonunun Sadıqlı kəndi ərazisində yerləşən sərhəd zastavasının xidməti sahəsində sərhəd naryadı tərəfindən Gürcüstandan Azərbaycan istiqamətində naməlum şəxslər tərəfindən dövlət sərhədinin pozulması müşahidə edilib.
Sərhəd zastavası dərhal "Silaha" komandası ilə qaldırılıb, ərazi qapadılıb və dövlət sərhədini pozmağa cəhd göstərən 7-si azyaşlı olmaqla 8 nəfər Azərbaycan vətəndaşı saxlanılıb.
Araşdırma zamanı saxlanılan şəxslərin dilənmək məqsədilə dövlət sərhədindən qanunsuz keçməyə cəhd göstərdikləri məlum olub.
Fakt üzrə əməliyyаt-istintaq tədbirləri dаvаm еtdirilir.