BAKI, 30 sentyabr - Sputnik. Azərbaycan və Özbəkistan hərbi-texniki əməkdaşlıq edəcək.
Bu, Milli Məclisin bu gün keçirilən iclasında müzakirəyə çıxarılan “Azərbaycan Respublikası Hökuməti ilə Özbəkistan Respublikası Hökuməti arasında hərbi-texniki əməkdaşlıq haqqında” Sazişin təsdiq edilməsi barədə” qanun layihəsində əksini tapıb.
Sənəddə deyilir ki, Milli Məclis Azərbaycan Konstitusiyasının 95-ci maddəsinin I hissəsinin 4-cü bəndini rəhbər tutaraq qərara alır:
“Azərbaycan Respublikası Hökuməti ilə Özbəkistan Respublikası Hökuməti arasında hərbi-texniki əməkdaşlıq haqqında” 2022-ci il iyunun 21-də Daşkənd şəhərində imzalanmış Saziş təsdiq edilsin.
Bildirilib ki, 2022-ci il iyunun 21-də Daşkənd şəhərində imzalanan saziş preambula və 13 maddədən ibarətdir. Sazişin əsas məqsədi hərbi-texniki sahədə qarşılıqlı faydalı əməkdaşlığın dərinləşdirilməsi və tərəf dövlətlərin müdafiə qabiliyyətinin gücləndirilməsidir.
Bundan başqa, “Azərbaycan Hökuməti ilə Özbəkistan Hökuməti arasında bitki karantini və mühafizəsi sahəsində əməkdaşlıq haqqında”, “Azərbaycan Hökuməti ilə Özbəkistan Hökuməti arasında beynəlxalq avtomobil əlaqələri haqqında”, “Azərbaycan Hökuməti ilə Özbəkistan Hökuməti arasında sənaye mülkiyyətinin mühafizəsi sahəsində əməkdaşlıq haqqında” Sazişlərə də baxılıb.
Sənədlər müzakirələrdən sonra səsverməyə çıxarılaraq qəbul edilib.