BAKI, 30 sentyabr — Sputnik. Azərbaycan təmsilçisi Rəna Əliyeva beynəlxalq müsabiqənin "Qran-pri"sinin sahibi olub. Bakıda "Buta Palace"da keçirilən III Beynəlxalq gözəllik müsabiqəsinin –" International Beauty and Model"in finalında müxtəlif ölkələrdən 20 uğurlu xanım iştirak edib.
Layihənin təşkilatçısı "Dünya gözəllik konqresi"dir (World Beauty Congress). Bundan əvvəl müsabiqə Çin və Qırğızıstanda keçirilib.
Bu il müsabiqədə Azərbaycan, Almaniya, Qazaxıstan, Qırğızıstan, Özbəkistan, İsrail, Rumıniya, Polşa, Rusiya, Belarus və Ukraynadan olan 18 yaşdan 40 yaşa qədər uğurlu xanımlar iştirak ediblər.
Onların arasında müxtəlif şirkətlərin, orta və ya böyük biznes sahəsindəki layihələr təsisçiləri və sahibləri, məşhur bloggerlər var.
Tədbirin fəxri qonağı "Оne in a million" mahnısı ilə bütün dünyada məşhurlaşan isveçli müğənni Bosson olub. Müsabiqənin "Qran Pri"sinin qalibi Azərbaycan təmsilçisi Rəna Əliyeva olub.
Dünya gözəllik konqresinin prezidenti, Azərbaycan moda assosiasiyasının baş direktoru Zamir Hüseynov bu layihəni gələn il də Bakıda həyata keçirmək niyyətindədir.