BAKI, 18 sentyabr — Sputnik. Bu gün Azərbaycanda "Youtube" platformasında trenddə olan musiqilərdən biri müğənni Nəfəsin "Sən də get" klipidir.
İkinci yerdə isə Türkan Vəlizanədinin "Ceyrana bax Ceyrana" mahnısı dayanıb. Mahnısı və ona çəkilən klipi youtube-da "trend"ə düşən müğğəni bu barədə danışarkən bildirib ki, bəzi müğənnilər "trend"i pulla alır:
"Amma mən onlar kimi trendə pul xərcləməmişəm, bütün mahnılarım kütlə tərəfindən dinlənilib və "trend" olub".
Üçüncü yerdə isə Sevil Sevinc & Nurlan Təhməzlinin "Popuri"si yer alıb.
Dördüncü yerdə isə son zamanlar dünyada və Azərbaycanda ən çox sevilən müğənnilərdən olan Hissin "Busan" mahnısı yer alıb.
Beşinci yerdə isə Vəfa Şərifovanın "Ceyrana Bax Ceyrana" mahnısı yer alıb.
Müğənni Aydın Sani də bu ay "trend"ə düşənlər sırasındadır. Müğənni "Nə üçün?" mahnısı ilə trenddədir.
Seriallara gəldikdə isə Azərbaycanda "trend"də olanlar əsasən Türkiyə seriallarıdır. "Kardeşlerim", "Kusursz Kiracı", "Bir küçük gün işığı", "Kasaba doktoru" serialları bu gün ən çox izlənilənlər sırasındadır.
Bəs görəsən, Youtube-da liderliyi qoruyub saxlamaq üçün hansı addımlar atılır?
İnsanlar tərəfindən bayağı hesab olunan mahnıların "trend"ə düşməsi hansı hallarda baş verir?
İnformasiya texnologiyaları üzrə mütəxəssis Nəriman Zeynalın sözlərinə görə, təkcə Azərbaycanda yox, bütün dünyada bayağı musiqilər "trend" olur:
"Bu gün xarici ölklərdə məşhur olan mahnıları bəh-bəhlə qarşılasaq da, onların sözlərinə diqqət etsək, görərik ki, mahnılar çox bəsitdir. Heç vaxt ciddi musiqi, sənədli filmlər "trend" olmayacaq. Çünki, ciddi əsərlərə çox az insan baxır. Şopenə hər kəs qulaq asmır, amma Üzeyir Mehdizadəyə əksəriyyət qulaq asır".
Mütəxəssis bildirir ki, sosial şəbəkələrə ödəniş olunanda həmin paylaşım digər insanın qarşısına çıxır, onlar da həmin paylaşımı klikləyəndə onlara baxış sayı hesablanır:
"Siz baxsanız da, baxmasanız da, sayı artır. Kütlə ən çox nəyi izləyirsə, həmin video başqasıının da qarşısına çıxacaq".