BAKI, 16 sentyabr - Sputnik. Ermənistan-Azərbaycan sərhədində vəziyyətin kəskinləşməsi bu gün hamımızı çox narahat edir.
Bu sözləri Rusiya Federasiyasının Prezidenti Vladimir Putin sentyabrın 16-da Səmərqənddə Azərbaycan Respublikasının Prezidenti İlham Əliyevlə görüşü zamanı deyib.
O qeyd edib ki, Şanxay Əməkdaşlıq Təşkilatı məkanında və Sammitdə həm təşkilatın özünün işi, həm də ikitərəfli münasibətlər, regionda vəziyyət barədə dəfələrlə söhbət edib, fikir mübadiləsi aparıblar.
"İkitərəfli münasibətlərə gəldikdə, onlar inkişaf edir, çox uğurla inkişaf edir, şübhəsiz, bunu qeyd etmək lazımdır. Ticarətin, investisiyaların həcmi artır, müxtəlif nazirliklər, idarələr, parlamentlər xətti ilə əməkdaşlıq həyata keçirilir", - Putin deyib.
Bununla belə, Rusiya prezidenti Ermənistan-Azərbaycan sərhədində vəziyyətin kəskinləşməsinin bu gün hamını çox narahat etdiyini bildirib:
"Biz Sizinlə bu barədə danışmışıq. Mən dünən gecə danışdım. Siz bunu bilirsiniz, mən bu barədə Sizi və Ermənistanın baş naziri Nikol Paşinyanı məlumatlandırmışam. Yaxşı ki, əlaqələndirilmiş səylərimiz sayəsində hər halda eskalasiyanı dayandırmaq mümkün olub, lakin mən belə başa düşürəm ki, hər halda vəziyyət gərgin olaraq qalır".
"Sizinlə görüşmək, bütün bu məsələlər barədə söhbət etmək imkanına görə çox şadam, çünki onların hamısı vacibdir", - deyə Putin Azərbaycan prezidentinə bildirib.
Xatırladaq ki, Azərbaycan Müdafiə Nazirliyinin yaydığı məlumata görə, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib.
Genişmiqyaslı təxribatın qarşısı alınarkən Azərbaycan Silahlı Qüvvələrinin 77 hərbi qulluqçusu şəhid olub.