BAKI, 11 sentyabr - Sputnik. Türkmənistan və Rusiya qaz tədarükü sahəsində rəqib deyillər. Bu barədə TASS-a Rusiyanın Türkmənistandakı səfiri Aleksandr Bloxin məlumat verib.
“Rusiya və Türkmənistan qaz sahəsində əməkdaşlıq edir. Rusiya qismən Türkmənistandan qaz alır. Bu, həm bizim üçün, həm də Türkmənistan üçün faydalıdır, çünki “Qazprom” tamamilə etibarlı ödəyicidir”, – deyə Bloxin bildirib.
Onun sözlərinə görə, əvvəllər Rusiya üçün əsas qaz istehlakçısı Avropa olub. İndi baş verən hadisələr fonunda bu bazar azalmağa başlayıb. İndi Rusiya Çinə qaz verir, Türkmənistan da belə edir. Bundan əlavə, Çin dünyanın ən böyük enerji istehlakçılarından biridir, ona görə də Türkmənistan tərəfi ilə bu məsələdə heç bir çətinlik və çəkişmə ola bilməz.
O əlavə edib ki, "Qazprom" özü qazı Türkmənistandan alır. Məsələn, 2021-ci ilin sonunda 10 milyard kubmetrə yaxın qaz alınıb.
Sentyabrın 10-da "Neytral Türkmənistan" nəşri yazıb ki, Türkmənistan prezidenti Serdar Berdıməhəmmədov hökumətə neft-qaz, kimya, toxuculuq və tikinti sənayesinin potensialını və mənfəətini artırmaq imkanlarını araşdırmağı tapşırıb.