BAKI, 6 sentyabr — Sputnik. Azərbaycanda 12,7 mm-lik, iriçaplı yeni pulemyot istehsal olunub.
İstehsal olunan yeni silah 2000 metrdən 3000 metrə qədər qısa və uzun qatarlarla atəş açma xüsusiyyətinə malikdir. Sözügedən pulemyot əsasən düşmənin canlı qüvvəsinin və yüngül istehkamlarının dağıdılmasında tətbiq edilir. Güllələr 3 il əvvəl hazırlanıb və daha sonra silahın yığılmasına başlanılıb.
Silahda 12,7 və 108 diametrli güllələrdən istifadə olunur.
Müdafiə sənayesi naziri Mədət Quliyev isə açıqlamasında bildirib ki, Azərbaycan Bakıda keçirilən 4-cü Azərbaycan Beynəlxalq Müdafiə "ADEX" və 13-cü Beynəlxalq Daxili təhlükəsizlik, Mühafizə və Xilasetmə "Securex Caspian" sərgisi çərçivəsində Türkiyə və İsraillə yeni silahların alınmasına dair müqavilələr imzalayacaq (APA).
Onun sözlərinə görə Azərbaycan həm Türkiyə, həm də İsrail şirkətləri ilə əməkdaşlığı davam etdirir:
"Türkiyə ilə birgə elə silahlar üzərində işləyirik ki, 10-15 il sonra üçün nəzərdə tutulub. Yəni, biz gələcəyə baxırıq. Hətta 20 il qabağa baxırıq. Bu dövlət başçısının tapşırığıdı".