BAKI, 5 sentyabr — Sputnik. “OPEC+” (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs - red.) bu gün keçirilən iclasda oktyabr ayında gündəlik neft hasilatının 100 min barel azaltmağı qərarlaşdırıb.
Bu barədə “APA-Economics” xəbər verir.
Xatırladaq ki, “OPEC+” üzvləri avqustun 3-də keçirilən iclasda sentyabrda gündəlik neft hasilatının 100 min barel artırılmasını təsdiqləyiblər. Yekun kommunikedə həmçinin vurğulanıb ki, dünyada sərbəst neft hasilatı imkanları ciddi şəkildə məhduddur və onlar ehtiyatla istifadə edilməlidir.
***
Dünya bazarlarında neft bahalaşıb. London birjasında "Brent" markalı neftin qiyməti 2,01 dollar artaraq 95,03 dollar, Nyu-York birjasında "Light" markalı neftin qiyməti isə 1,67 dollar bahalaşaraq 88,54 dollar olub.
Bu ilin avqustunda Azərbaycan neftinin orta qiyməti 95,02 dollara bərabər olub. Bu, ötən ilin avqust ilə müqayisədə 24,79 dollar çoxdur. Amma iyul ayı ilə müqayisədə isə avqustda Azərbaycan neftinin orta qiyməti 21,99 dollar azalıb.
Neft qiymətləri OPEC+ toplantısından əvvəl 2 faiz bahalaşıb.
Qeyd edək ki, bu gün OPEC+un toplantısı keçiriləcək. İnvestorların diqqəti bu toplantıya yönəlib. Toplantıda neft hasilatının mövcud səviyyədə saxlanılması və ya azaldılması ilə bağlı qərarın veriləcəyi gözlənilir.
Xatırladaq ki, Azərbaycan neftinin bir barelinin bu il ərzində maksimum qiyməti martın 9-da (135,99 dollar) qeydə alınmışdı.
Azərbaycanın builki dövlət büdcəsində bir barel neftin orta qiyməti 85 ABŞ dolları götürülüb.