BAKI, 24 avqust — Sputnik. Bütün KT (kompüter tomoqrafiya) müayinələr kimi ağciyər tomoqrafiyası da mütləq şəkildə həkim tərəfindən təyin edilməlidir.
Bunu Səhiyyə Nazirliyinin mütəxəssis-eksperti Ağakişi Yəhyayev koronavirusa yoluxan şəxsin hansı halda kompüter tomoqrafiyası olunmalı olduğuna münasibət bildirərkən deyib.
"Müalicə həkimi xəstənin şikayətlərinə əsasən, ağciyərdə prosesin nə dərəcədə getdiyini və yayılma əhatəsini (arealını) müəyyən etmək üçün KT tələb edə bilər", - ekspert bildirib.
Onun sözlərinə görə, xəstənin şikayəti, klinik müayinə və qan analizlərinə əsasən ona pnevmaniya diaqnozu qoyulur və ya belə bir ehtimal olur:
"Bundan sonra xəstəliyin şiddəti haqqında fikir bildirilməsi üçün ağciyər tomoqrafiyası çəkilir. Nəticə olaraq, tomoqrafiyada viral pnevmoniya təsdiqlənir, ağciyərin tutulma faizi hesablanır. Bütün bunlara əsasən müalicə strategiyası təyin olunur".
Mütəxəssis bildirir ki, maqnit-rezonans tomoqrafiya (MRT) müayinəsi KT-dən üstün deyil:
"MRT müayinəsi mədə-bağırsaq və ağciyərləri dəyərləndirə bilmir. Bu səbəbdən də ağciyər MRT-si çəkilməməlidir".