BAKI, 23 avqust — Sputnik. Rusiya prezidenti Vladimir Putin tacikistanlı həmkarı Emoməli Rəhmonla telefonla danışaraq, sentyabrda Özbəkistanda keçiriləcək ŞƏT sammitini müzakirə edib. Bu barədə Kremlin mətbuat xidməti məlumat yayıb.
"Rusiya-Tacikistan dostluq münasibətlərinin gələcək inkişafı ilə bağlı aktual məsələlər, həmçinin Şanxay Əməkdaşlıq Təşkilatının sentyabrda Səmərqənddə keçiriləcək sammitinin mövzuları müzakirə edilib", - məlumatda deyilir.
Tacikistan prezidentinin mətbuat xidmətinin məlumatına görə, Putin və Rəhmon aktual beynəlxalq problemlər və regional əməkdaşlığın mühim məsələləri, o cümlədən Əfqanıstandakı vəziyyətə diqqət yetirməklə regional təhlükəsizliyin təmin edilməsi barədə fikir mübadiləsi aparıblar.
Söhbət nəticəsində bu məsələlər üzrə təmasların davam etdirilməsi ilə bağlı razılıq əldə olunub, tərəflər arasında çoxşaxəli əməkdaşlığın daha da qurulmasının vacibliyi qeyd edilib.
ŞƏT sammitinin sentyabrın 15-16-da keçirilməsi nəzərdə tutulub. Hazırda təşkilata Rusiya, Hindistan, Qazaxıstan, Qırğızıstan, Çin və Pakistan, Tacikistan və Özbəkistan daxildir. Müşahidəçi ölkələr - Əfqanıstan, Belarus, İran və Monqolustan, tərəfdaş ölkələr - Azərbaycan, Ermənistan, Kamboca, Nepal, Türkiyə və Şri-Lankadır. Son zamanlar bir çox dövlətlər ŞƏT-ə üzv olmaq arzusunu ifadə ediblər. Xüsusilə, Səmərqənd sammitində İranın birliyə qoşulma prosedurunun başa çatdırılacağı və Misir, Qətər və Səudiyyə Ərəbistanına dialoq üzrə tərəfdaş statusunun veriləcəyi gözlənilir. Belarusun ŞƏT-ə tamhüquqlu üzv kimi daxil olmaq üçün müraciəti də araşdırılır.