BAKI, 18 avqust — Sputnik. Rusiya Aerokosmik Qüvvələri Nikolayev vilayətində 60-a yaxın ukraynalı millətçisini məhv edib. Bu barədə Müdafiə Nazirliyi məlumat yayıb.
Hərbi Hava Qüvvələrinin zərbələri Ukrayna Silahlı Qüvvələrinin 28-ci mexanikləşdirilmiş briqadasının 1-ci batalyonunun müvəqqəti yerləşmə məntəqəsində Nikolayev vilayətinin Posad-Pokrovskoye qəsəbəsi ərazisində həyata keçirilib. Hərbi idarənin məlumatına görə, nəticədə 8 ədəd xüsusi texnika məhv edilib.
Rusiya artilleriyasının Ukrayna Silahlı Qüvvələrinin 95-ci desant-hücum briqadasının "Donetsk Xalq Respublikası"nın Mazanovka kəndi yaxınlığındakı mövqelərinə endirdiyi zərbələr nəticəsində 250-dən çox ukraynalı millətçi məhv edilib.
Rusiya Müdafiə Nazirliyi Xarkovdakı əcnəbi muzdluların bazasına yüksək dəqiqliklə endirilmiş zərbə nəticəsində 90-dan çox silahlının məhv edildiyini açıqlayıb.
Bundan əlavə, Rusiyanın Aerokosmik Qüvvələri Xarkov vilayətinin Zoloçiv qəsəbəsi ərazisində xarici muzdluların müvəqqəti yerləşmə məntəqəsini məhv edib.
Polşa və Almaniyadan olan yüzdən çox silahlı öldürülüb, 50-dən çox yaralanıb.
Ukraynada nə baş verir?
Xatırladaq ki, Rusiya fevralın 24-də Ukraynada xüsusi hərbi əməliyyata başlayıb. RF Prezidenti Vladimir Putin onun məqsədini "səkkiz il ərzində Kiyev rejimi tərəfindən zorakılığa və soyqırıma məruz qalan insanların müdafiəsi" kimi ifadə edib.
Onun sözlərinə görə, bunun üçün "Ukraynanın demilitarizasiyası və denasifikasiyası"nın həyata keçirilməsi, Donbasda "mülki əhaliyə qarşı qanlı cinayətlərə" cavabdeh olan bütün hərbi cinayətkarların məsuliyyətə cəlb edilməsi planlaşdırılır.
Rusiya Federasiyasının Müdafiə Nazirliyinin məlumatına görə, Silahlı Qüvvələr yalnız hərbi infrastruktura və Ukrayna qoşunlarına zərbələr endirir.