BAKI, 29 iyul — Sputnik. ABŞ Nümayəndələr Palatasının sədri Nensi Pelosinin Çinin ada əyalətinə planlaşdırılan səfəri barədə məlumatlara baxmayaraq, Moskvanın Tayvanla bağlı mövqeyi dəyişməz olaraq qalır. Rusiya mediası xəbər verir ki, bunu Rusiyanın xarici işlər naziri Sergey Lavrov bildirib.
Lavrovun sözlərinə görə, Moskva Tayvan məsələsində qıcıqlandırıcı davranışların və təxribatların olmayacağını gözləyir.
"Bizim üçün bu məsələ tamamilə aydındır. "Vahid Çin"ə dair mövqeyimiz dəyişməz olaraq qalır. ABŞ vaxtaşırı eyni mövqeyi sözlərlə təsdiqləyir, lakin praktikada, özünüz də başa düşdüyünüz kimi, işlər həmişə sözlərlə üst-üstə düşmür", - deyə rusiyalı nazir vurğulayıb.
Lavrov əlavə edib ki, Rusiyanın Çinin suverenliyi ilə bağlı heç bir problemi yoxdur.
Çin Xalq Respublikası Tayvanı Böyük Çinin ərazisi hesab edir, baxmayaraq ki, adaya və onun hökumətinə rəsmi olaraq nəzarət etmir.
Xatırladaq ki, ABŞ Konqresində Pelosinin Tayvana səfərinin təfərrüatları açıqlanıb.