BAKI, 27 iyul — Sputnik. Qlobal istiləşmə ilə əlaqədar Arktikada buzlaqların sahəsi 4,81 milyon kvadrat kilometrə qədər azalıb. Norveç, ABŞ, Kanada və Böyük Britaniyadan olan beynəlxalq alimlər qrupunun araşdırmaları göstərib ki, buzlar əvvəllər düşünüldüyündən iki dəfə daha sürətli şəkildə əriyir.
Bu problemin əsas səbəbi iqlim dəyişikliyidir. Atmosferə çox miqdarda antropogen tullantılar yayıldığı üçün hava qızır və qlobal istiləşmə baş verir.
Arktika buzlarının yox olması dünya okeanının səviyyəsinin yüksəlməsinə, karbon birləşmələri ilə zəngin tullantıların artmasına, daha çox quraqlıq və yanğınlara, əbədi donuşluqda qalmış virusların və zəhərli maddələrin yayılmasına gətirib çıxara bilər.
Mütəxəssislər hesab edir ki, buna laqeyd yanaşmamaq və problemi həll etmək lazımdır. Bunun üçün təcili olaraq 2050-ci ilə qədər metan və karbon tullantılarını azaldaraq onların həcmini sıfıra çatdırmaq lazımdır. Yalnız bu halda Arktika buzlaqlarını xilas etmək şansı 80% arta bilər.