BAKI, 23 iyun — Sputnik. Rusiya Prezidenti Vladimir Putin və Belarus Prezidenti Aleksandr Lukaşenko üç gün - iyunun 23-dən 25-dək danışıqlar aparacaqlar. TASS xəbər verir ki, bu barədə Rusiya prezidentinin mətbuat katibi Dmitri Peskov məlumat verib.
Kreml nümayəndəsi qeyd edib ki, bu gün və sabah dövlət başçıları Rusiya Prezidentinin Tver vilayətində yerləşən Zavidovodakı iqamətgahında görüşəcəklər. Ünsiyyət qeyri-rəsmi xarakter daşıyacaq, onların nəticələri barədə mediaya məlumat verilməsi nəzərdə tutulmur.
Bundan əlavə, Peskovun sözlərinə görə, Rusiya Prezidenti BRICS-in XIV sammitinə həsr olunmuş videokonfransda iştirak edəcəyi üçün cümə axşamı görüş saat 15:00-da dayandırılacaq.
Daha sonra prezidentin mətbuat katibi jurnalistlərin Putinlə Lukaşenko arasında ünsiyyətin şənbə günü, iyunun 25-də Sankt-Peterburqda davam edib-etməyəcəyi ilə bağlı sualına müsbət cavab verib.
Bundan əlavə, dövlət başçılarının dialoqu Belarus ərazisində davam etdirəcəyi gözlənilir. Peskov onların iyunun 30-dan iyulun 1-dək Qrodnoda keçiriləcək Rusiya və Belarus regionlarının forumunda görüşməsini mümkün hesab edir.
Rusiya və Belarus prezidentləri sonuncu dəfə mayın 23-də Soçidə görüşüblər.