BAKI, 20 iyun — Sputnik. "LONGi" (Çin) və "Masdar Source Trading Company" (BƏƏ) şirkətləri arasında Qaradağ Günəş Elektrik Stansiyası (GES) layihəsi üçün yüksək effektiv panellərin tədarükü haqqında saziş imzalanıb.
"Masdar Source Trading Company" şirkəti Qaradağ GES-in tikintisi ilə məşğul olan "Masdar"ın törəmə şirkətidir.
Əbu-Dabidə keçirilən sazişin imzalanma mərasimində "LONGi" şirkətinin nümayəndəsi Tszya Çao bildirib ki, onun şirkəti Azərbaycanı təmiz enerji layihələrində dəstəkləmək üçün "Masdar" ilə əməkdaşlığa ümid edir.
Qaradağ GES-in tikinti layihəsi Azərbaycanda ilk iri kommunal miqyaslı günəş enerjisi layihəsidir ki, bu da ölkənin sosial-iqtisadi dayanıqlığına töhfə verəcək enerji təchizatının şaxələndirilməsinə zəmin yaradacaq.
Qaradağ rayonunda günəş elektrik stansiyasının təməli 15 mart 2022-ci ildə qoyulub.
Azərbaycanın Energetika Nazirliyi, "Azərenerji" ASC və "Masdar" şirkəti (BƏƏ) arasında bu yaxınlarda Abşeronda günəş stansiyasının tikintisi layihəsinin həyata keçirilməsinə dair sənədlər paketi imzalanıb.
Layihəyə qoyulan sərmayələr "Masdar" şirkətinin qoyacağı 225 milyon dolları təşkil edəcək. Layihə "build-own-operate" (tikinti - sahiblik - istismar - red.) prinsipi ilə həyata keçiriləcək.
Qaradağ GES-in 2023-cü ilin payızında istifadəyə verilməsi gözlənilir. Stansiyada 50 mindən çox günəş paneli quraşdırılacaq ki, bu da 550 hektar ərazini və 110 min ev təsərrüfatını əhatə edəcək. Layihə karbon tullantılarını ildə 200 min tondan çox azaldacaq, həmçinin yerli əhali üçün iş yerləri yaradacaq.
Qaradağ GES-in quraşdırılmış gücü 230 MVt olacaq, burada ildə 500 milyon kVt/saat elektrik enerjisi istehsal ediləcək.